إنهم يذبحون الأشجار 17: الخليفة المأمون

جاءتني هذه الرسالة - والصور - من الصديقة الفيسبوكيّة حنان نبيل.

بالرغم من فداحة الصور وفداحة اللي بيحصل إلا إني سعيد بالرسالة وبإن فيه ناس شايفة اللي أنا شايفه وحاسة بيه زييّ.

لو فيه ناس كثير زي حنان ممكن صوتنا يوصل ونوقف المهازل دي.

السلام عليك د. ميشيل 

طبعا أنا متابعة حملة إنهم يذبحون الأشجار لدرجة اني فعلا على طول في مصر الجديدة بافضل ألف و اتفرج علي الشجر و العمارات و جمال الفن المعماري اللي قامت عليه مصر الجديدة 

( الفاتحه هنا بقي علي روح البارون ... ربنا يكرمه :) 

المهم ... أنا أصلا ساكنة قدام نادي الشمس علي جسر السويس داخل أحمد عصمت ... طبعا مش هاقدر أشرحلك هنا و لا في مليون جواب القباحة و العفانة و القذارة اللي بقي عليها ميدان الألف مسكن .. الغريب هنا اني عمري كله ساكنة في المنطقه دي ... ما كانتش كده خالص و الله 

الأنيل ان جسر السويس كان لفترة طويلة مجموعة من الفيلات الصغيرة الهادية البسيطة ... أغلبية الشارع كان كده 

فجأة و من ساعة ثورتنا العظيمة المنكوسة ... في سنة و نص بس ...الفيلات كلها اتهدت و طلعت أقبح حاجه ممكن تتخيلها 

عمارات 12 و 20 دور ... جنب بعض جنب بعض .. زي عيدان الكبريت .. بطريقه فجه و كاشفه للنادي بتاعي الجميل الهادي ... 

المهم ... قصه ميدان الالف مسكن دي تطول 

نرجع لمصر الجديدة.. النهارده كنت في عيادة دكتور في 60 شارع الخليفه المأمون 

قدام العماره بتاعته فيه حوالي 3 فيلات ... بجد موقع رائع و منطقه حلم بالنسبة لي. المكان ده بالنسبه لي الجنة .. قدام البنزينة بعد ميدان روكسي 

( بمناسبه الميدان .. حضرتك عارف ان عند العبودي بقي موقف لعربات الميكروباص الجانكي (الجانكي ده لانها عربيات مكسره و من غير نمر و اللي بيسوقها في الغالب بيبقي طفل 15 سنه ...الكلام ده مش في دار السلام و لا عين شمس ... في ميدان روكسي .... بجد و الله ) 

المهم النهارده و انا رايحة للدكتور لقيت الكارثة دي و طبعا افتكرتك .. وقعدت أصور الشجر المقطوع حوالين الفيلا و انا باسب و بالعن البلد بالثوره بالإخوان بيا انا شخصيا 

اللهم لا اعتراض ... 

ندخل بقي علي الشجر اللي حوالين الفيلا رقم 58 شارع الخليفه المامون 

الشجر كله بقي أقرع 

انا مش فاهمة .. يمكن هم بيقطعوا كدا علشان يطلع ورق من جديد .. بس الجز بيكون بالشكل ده ؟ 

حرام و الله اللي بيحصل ده 

طبعا واضح ان الشجر اللي جوه الفيلتين محدش قدر يمد ايده عليهم بينما اللي بره اتجزوا علي الاخر 

انا أعتقد ان القصة دي كلها illegal 

يعني ممكن شركة تكون بتاخد الخشب و بتستفيد منه فعلا .. دايرة علي الشوارع تقطع في الشجر من غير ما حد يسال 

هو أصلا لو البني آدم دلوقتي اتقتل في مصر حد بيسأل هو اللي حصل ؟؟ 

حسبي الله و نعم الوكيل 

السلام عليكم

إنهم يذبحون الأشجار 16: أدهم بارك

مررت بالكوربة صدفة اليوم، وفجعت بأن القائمين على ملاهي أدهم بارك قد قطعوا كل أشجار الكافور المطلة على شارع البوسطة.

فراغ مرعب في المكان الذي ظل أخضر لما يزيد عن مائة عام متصلة

أشجار الكافور هذه عمرها من عمر ضاحية مصر الجديدة نفسها، حتى أنها مذكورة في كتاب ذكريات هليوبوليس الذي أصدره المركز الثقافي الفرنسي.

لا أعرف ما الذي يبنونه في الحديقة الخلقية لأدهم بارك (سينما وازيس في الأيام الأولى للضاحية)، لكن الأمر - حقا - قد وصل إلى مرحلة المسخرة التي لا يمكن السكوت عليها.

هذه الصورة قبل المذبحة

وهذه أيضا

صورة من جوجل إيرث تبين حجم وموضع الأشجار المذبوحة

إنهم يذبحون الأشجار 15

قبل

وبعد

المكان: شارع عثمان بن عفان، ميدان الإسماعيلية

إنهم يذبحون الأشجار 14

قبل

وبعد..

حقيقي دي أكثر شجرة زعلت عليها. حاجة تقهر.

مش قادر أفهم مين بهيم يعمل كده وليه؟

المكان: شارع السيد أبو شادي

عربية عندها صرع!