Tuesday, February 28, 2006

حتى انت يا جريندايزر!


بعد أن قمت بتنزيل بعض حلقات جريندايزر من الإنترنت، اكتشفت أنه حتى جريندايزر كانت الرقابة تحذف منه بعض المشاهد!
مثلا، هناك حلقة تعطل فيها جريندايزر وقام بلاكي باحتلال مركز الأبحاث مع جنوده – دائما ما كنت أشعر أن هذه الحلقة بها اختلال في السرد – في هذه الحلقة حذفوا المشاهد التي كانوا يعذبون فيها الدكتور آمون بإدخاله في آلة تدور حول نفسها بسرعة!
هناك حلقة أخرى يذهب فيها كوجي وهيكارو إلى حمام سباحة، يظهرون لنا هيكارو من رأسها فقط، بينما في الحقيقة كانت هيكارو ترتدي البكيني! حسنا، حتى الحلقة التي أنزلتها من الإنترنت من أحد المواقع الكويتية لم يكن بها هذا المشهد، لكني رأيته في أحد المواقع الفرنسية التي كانت تحتوي على بعض مشاهد الفيديو من المسلسل، والغريب أنها كانت تتحدث العربية في هذه اللقطة الموجودة في الموقع الفرنسي، مما يعني أنه هناك مستويات متعددة من الرقابة، فربما أتت هذه اللقطة رأسا من التليفزيون اللبناني الذي قام بدبلجة المسلسل بالعربية.
احتفظ اللبنانيون بالبكيني وبكل ما في المسلسل، بينما حذف الكويتيون البكيني واحتفظوا بالتعذيب، أما المصريون فحذفوا كل شيء!
حتى انت يا جريندايزر!
------------------------------------
شاهد هيكارو بالمايو هنا.

Saturday, February 25, 2006

100


التدوينة رقم 100.
وكعاده المدونين لازم نعمل تدوينة ننوه فيها عن وصولنا للرقم الجميل ده.

قفلة

ما ليش نفس أكتب.
عندي قفلة زي اللي عند ماركيز.

Friday, February 17, 2006

نارنيا

اتفرجت على نارنيا النهارده.
ما فيش فايده. لازم غصب عننا نقارن بينه وبين سيد الخواتم.
الفيلم فعلا ما فيهوش نقطة دم، رغم المعركة الهائلة اللي فيه، وده طبعا عشان ياخد أقل تصنيف رقابي ممكن في أمريكا وبالتالي يقدر يشاهده أكبر عدد من الناس وأقل سن للأطفال.
تحس ان الحكاية فيها عبط شوية وحتت مش منطقية كثير، الشخصيات مش مرسومة بعناية، التحول الدرامي في الأخلاق للولد إدموند على طريقة الأفلام العربية القديمة كان مش منطقي. جت منين القدرات الحربية اللي أهلت الولد العيل بيتر انه يحارب ويقود الجيش بحاله؟ حاجات كثير من النوع ده. مش عارف العيب في القصة ولا السيناريو المهلهل ولا الإخراج اللي ما قدرش يخلق للفيلم روح مختلفة. كصور ملونة للفرجة هي تسلية كويسة جدا ومعقولة.
سيد الخواتم كان شيء أسطوري هائل، مصنوع برقة وحرفية عالية ومزاج رايق. حاجة تهزك وانت بتتفرج.
لو عملوا جزء تاني من نارنيا ما اعتقدش اني هاروحه.

Tuesday, February 14, 2006

مطر

الدنيا مطرت النهاردة.
أول ما مطرت النور قطع. الدكتور اللي بيستلم مني الشغل اتأخر ساعة إلا ربع لأن الطريق من عين شمس كان مقفول والعربيات مكدسة في الطريق. كان عندي مشوار في مدينة نصر لغيته لأني متأكد إني سأجد تقاطع عباس العقاد مع الأوتوستراد مشلولا تماما. كان عندي كمان ميعاد مع دكتور السنان بالليل، الدكتور اعتذر.
شوية مطر ينزلوا والحياة في مصر تتوقف تماما.

Sunday, February 12, 2006

سرقة تاني!

لسة د. أحمد خالد توفيق كان بيقول في ندوة معرض الكتاب إني أكثر كاتب بتتسرق أعماله في مصر، ما فاتش أسبوعين على الكلام ده واتسرقت تاني!
بينما أقرأ العدد الجديد من جريدة التجمع، لقيت صحفية حرامية ناشرة موضوع المشنقة اللي كنت نشرته في بص وطل من كام شهر باسمها في الجريدة. الموضوع هوّ هوّ من أوله لآخره، ما عدا آخر 5 سطور دول من عندها. لا تعبت الحقيقة!
نرجع تاني للمربع رقم واحد. ليه الناس بتستحل لنفسها الأعمال المنشورة على الإنترنت؟ مع ان اسمي على مقال الإنترنت موجود بالبنط العريض، يعني المقال ده واحد تعب فيه وما اتخلقش بنظرية التوالد التلقائي اللي كانوا بيؤمنوا بيها قبل ظهور علم الوراثة. ولا زراير "كوبي" و"بيست" هي اللي بتشجع على كده؟ والأدهى انها تعيد نشر كلامي في جريدة أنا باكتب فيها! زي ما واحد سرق قصة مني ونشرها في نفس المجلة اللي كنت ناشرها فيها قبلها بكام شهر!
كتبت قبل كده عن المشكلة دي والصفاقة الجريئة دي لكن ما فيش فايدة، ومش هيكون.


Saturday, February 11, 2006

أحمر وأبيض وأسود


مع اني مش باستلطف شكل العلم المصري سيء التصميم، وباستبوخه وباحس انه بهتان وفقير لما أقارنه بأعلام زي أعلام الولايات المتحدة وبريطانيا وحتى اليابان، لكن أول مرة امبارح أحس ان العلم جميل بالشكل ده، وهو بيرفرف في أيدين 75 ألف واحد قاعد في المدرج، وعلى وشوش الناس وهدومهم وطواقي على رءوسهم.
حسيت اني حابب العلم قوي وعايز ألوّح بيه معاهم.
فعلا القوة المعنوية لرمز زي العلم بتيجي من استخدامنا ليه، (بعكس لما يتعلق في الوزارات والمصالح الحكومية بيبقى شكله بايخ قوي) ، ومن حجم العطاء اللي بيديهولنا العلم/ الدولة ممثلا في النصر الكروي اللي اتحقق، واللي فرّحنا بجد.

Friday, February 03, 2006

لغة الكون

"الرياضيات هي اللغة التي كتب بها الله الكون"

جاليليو

Wednesday, February 01, 2006

سا إيرا


أخيرا أصدر روجر ووترز، عضو فريق بينك فلويد السابق، ألبومه الأوبيرالي "سا إيرا" (هناك أمل).
ظل روجر ووترز يعمل في هذا الألبوم منذ عام 1987! وهو مستوحى من أجواء الثورة الفرنسية، وعنوان الألبوم هو اسم أغنية فرنسية كان يغنيها الثوار عام 1790، وتم تسجيلها عدة مرات على مدى السنوات، وأشهر من غناها أديث بياف المغنية الفرنسية الشهيرة.
لا شك أنه عمل هائل الإتقان. صحيح أنني لم أستمع إليه بعد لأن مورفيوس لم ينته من تنزيل الألبوم، إلا أنني لا يمكن ألا أعجب بعمل من أعمال ووترز، خاصة تلك الأعمال التي تستغرق 10 سنوات لإنجازها.