فات سنة ونصف تقريبا من آخر مرة كتبت فيها حاجة على البلوج، ودي أعتقد أطول فترة غياب حصلت، حتى مع حصول الانحدار والانحسار للمدونات من وقت طويل.
أنا كنت مخصص المدونة في آخر كام سنة لتوثيق عمليات ذبح الأشجار في مصر. 100 موضوع لحد دلوقت تحت نفس العنوان: إنهم يذبحون الأشجار. مافيش حاجة اتغيرت. الموضوع في آخر سنة تحول من حالات فردية لحالات ذبح جماعي مجنونة، وخطة ممنهجة، وسياسة عامة، غير قابلة للإيقاف، والاعتراض ممنوع، والتعتيم الإعلامي مفروض، والذبح بيتم في نفس الوقت اللي بتتعمل فيه حملة اسمها اتحضر للأخضر، هدفها التشجير، بس هي مجرد كلام. بنقول بس اننا بنشجر والبلدوزرات بتقلع وتدبح في الخلفية. بعد عمليات الفرم المجنونة دي للشوارع والجناين خلاص ما بقاش فيه فايدة ولا لازمة للتوثيق. كله بيتشال واللي فاضل هيتشال لا محالة. سياسة عليا. ممنوع تتكلم عن السياسات العليا. تفهم إيه انت يا حمار انت وهو؟
لا كتابة تنفع ولا تصوير ولا كلام ولا اعتراض. اللي عايزينه هيتعمل. أعتقد إن ده البوست الأخير.
