Wednesday, November 16, 2005

عالم يخلو من الأدب


عندما كنت صغيرا أرعن، كان يتنامى إلى سمعي أن الدنيا فيها حاجات وحشة، زي المخدرات والدعارة مثلا. كنت متخيّل إن الحاجات دي قليلة جدا ونادرة جدا في المجتمع، والناس اللي بتعملها ناس وحشة ومجرمة زي الأشرار اللي بنشوفهم في الأفلام.

لما بقيت صيدلي الدنيا كلها اتغيرت من حوليَّ. لقيت انّ الناس المجرمة دي هي معظم الناس اللي حوالينا. الناس كلها بتضرب مخدرات من كل الأنواع. بانجو وحشيش وأدوية، وكل طبقات المجتمع. أمين شرطة يجيلك يقول لك أنا عندي تحليل بكرة يا ترى الحشيش اللي شربته أول امبارح يبان في الدم ولاّ لأ. أو ناس من مستويات اقتصادية مرتفعة وفي مناصب مرموقة (بعكس الشائع عن أن المخدرات هي وقود المطحونين واليائسين) تتصّل بيك تقول لك شوف لي مسكن جامد لأن أنا راجل صاحب مزاج وما بتنفعش معايا المسكنات العادية. ده غير العيال اللي بيشموا الكولّة وماليين الشوارع. المخدرات شيء عادي جدا دلوقت، ولا ينظر إليه على أنه عيب.

اللي اكتشفته جديد ان الدعارة منتشرة بفظاعة. عيال في ثانوي ييجوا الصيدلية عشان يشتروا توبس وهم مروحين من المدرسة. بتاع الجرايد اللي كنت باتعامل معاه من كام سنة جاي يشتكي النهاردة إن فيه واحدة ندهت له من البلكونة ولما طلع لها قفلت على جوزها النايم بالمفتاح بس لما جه يعمل معاها حصل له ارتخاء. ابن بواب العمارة اللي قصاد الصيدلية اللي مش متجوز جاء ليأخذ فياجرا ولما ضغطت عليه قال انه رايح يقابل واحدة في ميدان المحكمة. نفس الواحدة دي بيروح لها أخوه الكبير المتزوج والتاني ما يعرفش. الموظف اللي في شركة السياحة جاله سيلان من سائحة. ابن صاحب المقلة اللي ع الناصية بيجيله سيلان كل 6 شهور. دكتور لسة راجع من فرنسا وجاي الصيدلية ( على أساس انها بعيدة عن سكنه وماحدش يعرفه فيها) ومعاه حقنه توجاميسين عايز ياخدها احتياطي. فيه طالب في العمارة اللي قصاد الصيدلية ساكن لوحده عشان يذاكر ومحوّل الشقة إلى وكر. مين كمان؟ فيه كوفي شوب قريب برضه مشهور بتوريد البنات. كذا مرة تيجي لي منه واحدة تقول لي أنا عملت حادثة لكن شكلها بيقول إنها مضروبة بافتراء لمّا جسمها كله بقى كدمات زرقاء. على فكرة العاهرة من دول بتتعب فعلا والمهنة دي خطرة. صديق كان معايا في ثانوي فوجئت بيه بيقول لي انه لما بيحط إيده على العضو بتاع خطيبته (ولا حبيبته ولا إيه) بيطلع صوت هوا، تبقى بنت بنوت ولا لأ؟

ده غير الشغالات اللي ييجوا يسألوا على حاجة تنزّل البيبي.

خدوا دي كمان. زميلي اللي بيقف في الصيدلية بعد الظهر بيقول لي فيه بنت دخلت هي وأمها والبنت بتقول له ألاقي عندكم العضو الذكري الصناعي؟ زميلي جاله ذهول وقعد على الكرسي ما قدرش يقف! قال لها ما فيش. قالت له ازّاي ما فيش أمال انتو صيدلية ازّاي؟ أمّال ألاقي فين؟ قال لها شوفي في "علي وعلي"!

ده غير الأصدقاء اللي بيفاجئوني بحكايات عن مغامراتهم الصياعية لما أهاليهم يسافروا والشقة تبقى فاضية، أو في العربية ع الطريق الصحراوي! كنت متخيل إن الزنا ده شيء صعب جدا ومدمر نفسيا، مش فعل يتعمل بالبساطة دي وبدون أي تردد أو تأنيب ضمير.

حاجة غريبة جدا. مش هي الدنيا اللي كنت متخيلها. مش بالكثرة دي والانتشار ده.

10 comments:

Zeryab said...

يا باشا ده انت اللى حكيته ده اللى هو يدوبك وش قفص..بس انت اثبت بس

mindonna said...

أهلا بك في الدنيا يا ميشيل

يا سلام يا ميشيل ، أكيد هتشغلني عندك طبعا بعد ما أتخرج يعني:)

انا اعتقد ان الحشيش والبانجو و الحاجات دي كترت في مصر لأسباب زي حال البلد المنيل أو عدم الوعي أو الفراغ الشديد
بدليل ان التدخين بره مش منتشر زي هنا او في الدول العربية

عادي يا ميشيل انا كل مرة كنت بفتكر ان الدنيا مش وحشة للدرجة دي
دلوقتي بقيت أقول ان الدنيا أسوأ مما أتصور
و من يوميها معنتش بندهش من أي حاجة :)

R said...

تدوينة قويّة فعلاً...

بس فين أسرار المهنة؟

خجل said...

عالم يخلو من الأدب

Anonymous said...

بصراحة يا دكتور مقالك انا معظم الحاجات دي تعاملت معاها بحكم اني صيدلي برضه ( لسه طالب )

يعني موقف حصل ليا مثلا كنت في الصيدلية و ظابط دخل عليا
بجد الظابط كان معاه سيجارتين حشيش و دخل عليا و هو عارفني
مساء الفل عالدكتور الصغير
ازيك يا باشا اخبار معاليك
طبعا النهاردة الخميس الليلة الكبيرة و انت عارف قولتله طبعا قالي انا عايز كبسولتين ترامادول و حباية فيجا
طبعا فيجا شئ عادي لكن ان ظابط بوليس المفروض انه بيكافح الجريمة هو اللي معاه الحشيش و الكيميا
موقف تاني حصل طالبة في ثانوي دخلت بتسأل على حبوب منع الحمل و بما اني كنت واقف في الصيدلية اختارت اللي باين انه من سنها اكتشف انها بتحب واحد صاحبها و متجوزين عرفي من شهرين و خايفة ليحصل حمل ... طبعا الموضوع كان مثير للذهول .. بنت عندها 16 سنة او اقل و متجوزة عرفي
العيال الصغيرة كمان نفس القصة الواد يدخل ياخد حبوب فيجا او فياجرا لأبوه وتسأل الواد عرف الحاجات دي منين ؟؟؟

احنا لازم نعدل نفسنا قبل ما نعدل عاللي حوالينا
شكرا ليك يا دكتور
Dr-SeMSeM

الست نعامة said...

يا ميشيل فعلاً أهلاً بك في الدنيا الكبيرة.
مش لازم تكون صبدلي عشان تشوف الحاجات ديه. ممكن تشوفها في أي حتة وأي مكان بس لازم تكون مفتح عشان تاخد بالك.

مرحبًا بك تاني.

Michel Hanna said...

أهلا بكم جميعا في هذا العالم القاسي.

Anonymous said...

ميشيل أنا متابع لكتاباتك فى رواياتى
بس أحب أقوللك أن الدنيا أنيل من كده
لما تبقى فى الجامعة و عارف مواعيد الدورة الشهرية لكل زميلاتك
أو عارف أن الواد ده متجوز أو ماشى مع البت دى
و الصدمة لما تكتشف ان بنتين من الشلة ما هما ألا فتاتين شاذتين يمارسوا الشذوذ فى منازلهم و فى حجراتهم بوجود أهلهم على أساسا أن البنات قاعدين يتكلموا سوا
لما أعرف من بنت أن هنا فى أسكندرية فى صيدلية معروفة بتبيع الأجهزة الجنسية من أعضاء بأنواعها و مناطق أخرى معينة فى الجسم
كالصدر و الفم و المؤخرات
حتى العضو الذكرى الموديل الجديد بالموتور vibration
لما أكون فى أعدادية و طول عمرى أسمع عن البنات اللى لامؤاخذة بيتلزق و يتحك فيها فى المواصلات
و أتفاجأ بأن ده بيحصلى (أنا ولد)وأكتشف وجود الشذوذ فى العالم من حولى فعلا
لما مدرسة فى مدرستك الثانوى تتمسك مع مدرسك فى أوضة المدرسين
لما مدرستك تتحرش بيك فى الدرس الخصوصى و لا تفتحلك الباب و هى بالفوطة علشان لسه خارجة من الحمام
لما تعدى قدام سينما درجة تالتة ده أذا ماكنتش درجة تاسعة و تتعاكس من رجالة و ستات على حد سواء بكلمات أكثر من بذيئة
لما تكون بتشتغل فى سوبر ماركت و تتحرش بيك زوجة منقبة مع زوجها الخليجى بدون علمه عينى عينك
أو بنت ضابط تدخل و تقولك صراحة انها عايزة تنام معاك لانها دى هواية و انت داخل دماغها
و تقولى فاكر الزنا صعب ده كتير بس أحنا اللى صدقنا أهالينا لما قالوا لنا أن الدنيا دى فيها ناس وحشين و حسسونا أنهم بعيد عننا

ملحوظة:
لا أنكر أستسلامى لبعض الاغراءات فى بعض الاحيان سامحنى فى النهاية أنا ذكر جسده يطلب الرغبة فى الجنس فى بعض الاحيان و مازال حلم الزواج بعيدا
أنظر معى ألا يبدو سرابا

Michel Hanna said...

عزيزي المجهول: كلامك مثير للشجون ومحزن. أهلا بيك انت كمان في العالم القاسي.

مهندس مصري بيحب مصر said...

مش عارف إيه رأيك دلوقت بعد الثورة يا ميشيل
بس الثورة مش حتقلب الخطاة في لحظة لملائكة أطهار
أنا شايف ده مزيج من قلة المعرفة بالدين و الأزمة الإقتصادية الطاحنة

الناس دي لازم يتيسر لها الزواج بشكل مناسب بدون تكاليف باهظة
و تعرف دينها كويس اللي بيؤكد إن الزنا خطيئة عظمى سواء في الإسلام أو المسيحية

ربنا يهدي عبيده
و يكون في عونك و انت بتشوف البلاوي دي